互老爸的話

今日是阮爸的告別式，以下是刊登佇告別式程序單頂面的話語：

爸，代誌發生那一工透早，我欲去上班，你欲去洗腎，我猶看你家己行出門，精神袂歹。

代誌發生前一日，我攜你倒去高雄回診，院長謳咾你情形甚好，閣見著換肝的老朋友，歡喜開講一陣。

代誌發生前兩日，想未到你竟然有法度家己爬上二樓，坐佇亭子腳吹風賞景緻，我抱咱那兩隻貓互你摸，看你用中風的左手順順咧摸貓仔，貓爽你亦爽的表情真可愛。

代誌發生前三日，筱筠提議講來去十字亭看阿公阿媽，咱佇遐看附近風景，感覺未來住遮真舒適，想袂到你馬上就欲搬入去住。

代誌發生前一禮拜，咱第一次舉行家庭讀經，由我唸馬太福音第一章互你共媽媽聽，幫你解釋耶穌的家譜。咱閣有唱詩歌，是新聖詩「上帝是我救主」。我過去呣曾聽你唱歌，聽見你唱歌非常歡喜。阮佇告別式也會唱這首，你就佇天頂隨咧唱吧！

代誌發生前兩月日，你的兩個孫欲受洗禮，咱全家歡喜聚集，領受上帝的恩典，那當時你有共媽媽交代你的告別式愛按怎辦理，雖然無共阮講，總是你已經有準備。

代誌發生前半年，咱全家來去台東尋姑婆，你細漢時陣就是互姑婆照顧大漢，所以一直想欲去看上照顧你的人，今也已經實現，閣好好欣賞台灣東部的好風景，總是倒來無久你就中風，無法度閣畫圖。

代誌發生前真久以前，我猶咧讀幼稚園，你講乃蠻將軍的故事互我聽，教示我信心的重要性，總是只有信心猶無夠，愛去做才會實現，實現了亦愛記得，上帝伊掌權，愛感謝上帝。

我想上帝已經為你備辦便便，互你人生最後的日子愈圓滿、愈親近上帝。

真想你，爸，呣拘亦替你歡喜，我知最後幾年的日子，你因為病痛著磨，總是無法度放落家庭、學生，亦一直希望台灣早日獨立建國，閣有多多圖面想欲創作。今你呣免閣煩惱啊！因為天父已經攜你轉去祖家，你欲畫什麼圖你就畫吧！免管市場愛什麼款，也免管講理論的有什麼意見，你就照你戰鬥的人生，愛按怎畫就按怎畫，因為上帝已經接納。

你著稍等一咧，另工阮亦會去天國共你相及聚集，總是愛等阮無閒了才講，你亦呣免甚過操煩，咱的天父會給咱攬牢牢，心平安，免煩惱啦！